Nettverkslunsj hos Årdal Teknologipark – Eit spanande samarbeid for berekraftige løysingar
Den andre nettverkslunsjen i samarbeid mellom Sogn Kompetanse, SITEP og Årdal Utvikling vart arrangert i Årdal Teknologipark og samla 30 deltakarar frå lokalt arbeids- og næringsliv.
Frå mikroplast til berekraftige alternativ
Frank Øvstetun frå SITEP opna arrangementet og løfta fram eit viktig spørsmål:
Er det eigentleg forsvarleg å la barna våre leike på underlag som inneheld høge nivå av mikroplast og giftige kjemikaliar?
Dagens leikeplassar har ofte fallunderlag laga av gummi, men desse inneheld miljøgifter og bidreg til mikroplastforureining. For å finne ei betre løysing, treng vi alternativ – og her kjem Biospinout One inn i biletet.
Biospinout One – Berekraftig innovasjon i praksis
Tone Berge, dagleg leiar i Biospinout One, delte selskapet si inspirerande reise. Som arkitekt har ho sett korleis byggebransjen – som står for 40 % av globale klimagassutslepp og 36 % av ressursforbruket i EU – har eit skrikande behov for meir berekraftige løysingar.
Biospinout One er ein spinout frå Bioregion Institute som starta i 2020. Målet? Å utvikle nye, miljøvenlege materialer basert på ressursar frå Vestlandet. Etter fleire år med forsking og innovasjon, vart selskapet Biospinout One etablert i 2023.
Gjennom samarbeidet mellom Årdal Utvikling, SITEP og Biospinout One har det blitt utvikla eit innovativt fallunderlag for leikeplassar, laga av resirkulert tre og sopptrådar. Underlaget er bionedbrytbart, universelt utforma og tåler fallhøgd på opptil 3 meter – samstundes som det reduserer mikroplast og fremjar jordhelse.
Noreg sine 24 000 leikeplassar – tid for endring?
I dag finst det rundt 24 000 leikeplassar i Noreg med gummiunderlag, noko som utgjer ein stor miljøbelastning. Gummien inneheld miljøgifter og krev mykje energi å produsere. Alternativ som Biospinout One sitt fallunderlag kan bidra til både betre helse, mindre utslepp og meir berekraftig ressursbruk.
Ein spanande moglegheit som vart diskutert under lunsjen, var korleis spillvarme frå Hydro i Årdal kan nyttast til pasteurisering av materialet – noko som kan gi ein ekstra miljøgevinst.
Framtida for levande fallunderlag
Løysinga er framleis i utvikling, men pilotproduksjon er godt i gang, og målet er å teste fallunderlaget i full skala på leikeplassar i Oslo og Bergen i 2025.
Engasjementet blant deltakarane var stort, med gode spørsmål, diskusjonar og nye idéar før vi gjekk vidare til lunsj og mingling.
Ein stor takk til alle som deltok – vi gler oss til å sjå både kjente og nye fjes på neste nettverkslunsj!